कैलाली लम्कीचुहा, क्षितिज जैसी
कैलालीको लम्कीचुहामा रहेको कालिका माध्यमिक विद्यालय, भुरुवाले विद्यालय, शिक्षक, अभिभावक तथा विद्यार्थीहरूबीच परस्पर संवाद, समझदारी र सहकार्यलाई बलियो बनाउने उद्देश्यले अन्तरक्रियात्मक कार्यक्रम सम्पन्न गरेको छ। विद्यालयको सभा हलमा आयोजित यस कार्यक्रमले गुणस्तरीय शिक्षा प्रवाहमा सबै पक्षको भूमिकालाई अझ स्पष्ट गर्दै आगामी सुधारका मार्गचित्रहरू तय गर्न प्रयास गरेको छ।
कार्यक्रम विद्यालयका प्रधानाध्यापक श्री दिलराज थापाको सभापतित्वमा सम्पन्न भएको थियो। प्रमुख अतिथिको रूपमा विद्यालय व्यवस्थापन समितिका अध्यक्ष श्री चन्द्रप्रसाद आचार्यको उपस्थिति रहेको उक्त कार्यक्रममा विभिन्न पक्षबाट सुझाव, सरोकार र समाधानमूलक विचारहरू प्रस्तुत गरिएको थियो।
शैक्षिक क्षेत्रमा लामो अनुभव बोकेका प्रधानाध्यापक श्री दिलराज थापा, जो वि.सं. २०६५ सालदेखि निरन्तर उच्च माध्यमिक तहमा अध्यापन गराउँदै आउनु भएको छ, कार्यक्रमलाई सम्बोधन गर्दै भन्नुभयो, “विद्यालयको समग्र सुधार र गुणस्तरीय शिक्षा प्रवाहको लागि त्रिपक्षीय समझदारी — विद्यार्थी, शिक्षक र अभिभावकबीचको सहकार्य — अति आवश्यक छ।”
उहाँले थप भन्नुभयो, “विद्यालयको समृद्धि केवल एक पक्षको प्रयासले सम्भव हुँदैन। सबै पक्षको सहकार्य, विश्वास र साझा जिम्मेवारी आवश्यक पर्छ। यस्ता अन्तरक्रियात्मक कार्यक्रमहरू त्यसको सुरुवात हुन्।”
कार्यक्रममा विद्यालय व्यवस्थापन समितिका अध्यक्ष चन्द्रप्रसाद आचार्यले विद्यालयको प्रगतिका लागि विद्यार्थीहरूको शैक्षिक उपलब्धिमा गुणात्मक सुधार हुनु जरुरी रहेको औंल्याउनुभयो। “शिक्षक र अभिभावकले मिलेर विद्यार्थीहरूको कमजोरी पहिचान गरी सुधारमा सघाउनु आवश्यक छ,” उहाँले भन्नुभयो।
कार्यक्रमको शुरुवात विद्यालयका उदयमान, अनुशासित र शालीन शिक्षक श्री उदय खनालको स्वागत मन्तव्यबाट गरिएको थियो। कार्यक्रमको समन्वय र सञ्चालन शिक्षक रामप्रसाद तिमल्सिनाले गर्नु भएको थियो, जसले कार्यक्रममा सबै पक्षलाई समेट्न सफल सहजीकरण गर्नुभयो।
कार्यक्रमको मुख्य आकर्षण अन्तरक्रिया सत्र रह्यो, जहाँ उपस्थित अभिभावकहरूले आफ्ना जिज्ञासा, गुनासो तथा सुझावहरू विद्यालय प्रशासन समक्ष राखेका थिए। सो अवसरमा विद्यालय प्रशासनले अभिभावकहरूलाई तथ्यमा आधारित स्पष्ट र संतोषजनक उत्तर प्रदान गरेको थियो।
कार्यक्रममा कक्षा ८ र १० का विद्यार्थीहरूका लागि अतिरिक्त कक्षा सञ्चालन गर्ने प्रस्ताव पनि प्रस्तुत गरिएको थियो, जसलाई उपस्थित सबैले सर्वसम्मत रूपमा पारित गरेका थिए। यसले विद्यार्थीहरूको शैक्षिक उपलब्धिमा सुधार ल्याउने अपेक्षा गरिएको छ।
कार्यक्रमको समापनमा प्रधानाध्यापक थापाले भन्नुभयो, “आजको यो कार्यक्रम कुनै अन्त्य होइन, अबदेखि यस्ता संवादमूलक अन्तरक्रिया नियमित रूपमा र कक्षागत रूपमा पनि सञ्चालन गरिनेछ। हामी सधैं सुधार र सहकार्यको बाटोमा अघि बढ्नेछौं।”
अन्तमा, कार्यक्रमले विद्यालय, शिक्षक, विद्यार्थी र अभिभावकबीच आपसी समझदारी र उत्तरदायित्वको भावना सुदृढ बनाएको विश्वास गरिएको छ। यस्तो समन्वयात्मक प्रयासले विद्यालयको शैक्षिक यात्रा अझ प्रभावकारी र समृद्ध बनाउने अपेक्षा गरिएको छ।
