जिउँदो व्यक्तिलाई मृत घोषणा गरेर आर्थिक लाभको उद्देश्यले सिफारिस दिने कार्यमा संलग्न शैल्यशिखर नगरपालिकाका कृषि स्नातक प्राविधिक दीपकराज विष्ट र शैल्यशिखर नगरपालिका–६ मा रहेको ‘मालिकार्जुन अगुवा कृषक समूह’ का अध्यक्ष जनक सिंह धामी पक्राउ परेका हुन् ।
उनीहरूलाई बुधबार पक्राउ गरिएको जिल्ला प्रहरी कार्यालय दार्चुलाका प्रहरी निरीक्षक छत्रबहादुर रावतले जानकारी दिए । घटनासँग सम्बन्धित कागजात संकलन गरी अनुसन्धान अगाडि बढाइएको प्रहरी निरीक्षक रावतले बताए।
यस्तो थियो विवाद
केही समयअघि जनक सिंह धामीले जीवित व्यक्तिलाई मृत घोषणा गरी बैंक खाता नवीकरण गर्ने प्रयास गरेका थिए । शैल्यशिखर नगरपालिका–६ मा रहेको ‘मालिकार्जुन अगुवा कृषक समूह’ का अध्यक्ष जनक नै हुन्। यस समूहका लागि वडागत कृषि कार्यक्रमअन्तर्गत नगरपालिकाबाट दुई लाख ४० हजार रुपैयाँ बजेट विनियोजन गरिएको थियो। ओखरको बोट खरिद गरेर कृषकलाई वितरण गर्ने उद्देश्यले उक्त रकम छुट्याइएको वडा नं. ६ का वडाध्यक्ष जगदीश धामीले बताए।
उनका अनुसार, ‘‘बोट खरिदपछि समूहभित्र विवाद भएको रहेछ। त्यसपछि कोषाध्यक्ष जानकी धामी र सचिव मञ्जु धामी रकम भुक्तानीका लागि चेकमा हस्ताक्षर गर्न तयार भएनन्।’’ रकम भुक्तानी नभएपछि अध्यक्ष जनकसिंह धामी र शैल्यशिखर नगरपालिकाका कृषि स्नातक प्राविधिक दिपक राज विष्टको मिलेमतोमा कोषाध्यक्ष जानकी र सचिव मञ्जुलाई मृत घोषणा गरिएको भेटिएको हो।
कृषि स्नातक प्राविधिक विष्टले ग्लोबल आइएमई बैंक, गोकुलेश्वर शाखालाई खाता नवीकरणका लागि पत्र पठाउँदै भनेका थिए, ‘समूहका कोषाध्यक्ष जानकी धामी र सचिव मञ्जु धामीको मृत्यु भइसकेको हुँदा अब अध्यक्ष जनकसिंह धामी र नयाँ सचिव बसन्ती बोहराको हस्ताक्षरबाट खाता सञ्चालन गर्न अनुमति दिनुहुन सिफारिसका साथै अनुरोध गर्दछु।’ तर, बैंकले उक्त नवीकरणको पत्र प्राप्त गरेपछि सचिव र कोषाध्यक्ष दुवैलाई सम्पर्क गर्दा उनीहरू जीवितै रहेको खुलेको हो ।
