कैलालीको भजनी नगरपालिका वडा नम्बर–४ झलझलियामा निर्माण भइरहेको जैविक तटबन्धको सोमबार संयुक्त अनुगमन गरिएको छ।
मर्सीकोर नेपाल, नेपाल राष्ट्रिय समाज कल्याण सङ्घ (एनएनएसडब्लुए) र द कोकाकोला फाउन्डेसनद्वारा सञ्चालित ‘नेपालमा पूर्वानुमानमा आधारित पूर्वकार्यको सुदृढिकरण’ (सान) परियोजना अन्तर्गत भजनी नगरपालिकासँगको सहकार्यमा जैविक तटबन्ध निर्माण कार्य थालिएको थियो।
सोमबार भजनी नगरपालिकाका उपप्रमुख राजु तिरुवा, प्रमुख प्रशासकीय अधिकृत भोजराज भट्ट, वडा नम्बर–४ का वडा अध्यक्ष जनता राम चौधरी लगायत वडा सदस्य र नगरपालिकाका विपद् सम्पर्क व्यक्ति तथा सान परियोजनाको टिमले संयुक्त अनुगमन गरेको हो।उक्त क्षेत्रमा ७५० मिटर जैविक तटबन्ध निर्माणको कार्य चलिरहेको छ। उक्त कार्यका लागि नगरपालिकाको ६ लाख ८६ हजार विनियोजन गरिएको थियो। त्यस्तै नेपाल रेडक्रस सोसाइटीको ५ लाख ४९ हजार, एनएनएसडब्लुएको ११ लाख र समुदायको २ लाख ५८ हजार (जनश्रमदान) जोडिँदा करिब २५ लाख ५४ हजारको संयुक्त लगानीमा उक्त योजना थालिएको हो।
अनुगमनका क्रममा भजनी नगरपालिकाका उपप्रमुख राजु तिरुवा र प्रमुख प्रशासकीय अधिकृत भोजराज भट्टले नदी कटानको जोखिममा रहेका स्थानीयका लागि यो तटबन्धले ठूलो सुरक्षा प्रदान गर्ने बताउनुभयो।
वडा नम्बर–४ का वडा अध्यक्ष जनता राम चौधरीले तटबन्ध पूरा भएपछि करिब ४३५ घरधुरी प्रत्यक्ष रूपमा सुरक्षित हुने र विगतमा बगेर बाँझिएको जमिन फेरि उत्पादनमा फर्कने बताउनुभयो। उहाँले यसबाट स्थानीयको आम्दानी बढ्ने र जनजीवनमा सहजता आउने उल्लेख गर्नुभयो।
सान परियोजनाका संयोजक देवराज बडुले जैविक तटबन्ध निर्माण कार्यलाई प्रभावकारी, पारदर्शी र दिगो बनाउन परियोजनाले विशेष प्राथमिकता दिएको बताउनुभयो। उहाँले उपभोक्ता समितिका पदाधिकारी तथा सदस्यहरूलाई बायो–इन्जिनियरिङ्गका जटिल प्राविधिक पक्ष, संरचना निर्माणका आधारभूत मापदण्ड, सामुदायिक सहभागिता तथा पारदर्शी लेखा व्यवस्थापनका प्रक्रियाबारे विस्तृत अभिमुखिकरण समेत प्रदान गरिएको जानकारी दिनुभयो। संयोजक बडुले स्थानीय स्रोतसाधनको प्रयोग र समुदायको सक्रिय श्रमदानले गर्दा यो तटबन्ध परम्परागत संरचना भन्दा दिगो र वातावरणमैत्री हुने उल्लेख गर्नुभयो।
जैविक तटबन्ध उपभोक्ता समितिका सचिव टेक बहादुर रावलले समुदायको श्रमदान र साझेदार संस्थाहरूको प्राविधिक साथले गर्दा तटबन्ध निर्माणले तीव्र गति लिएको बताउनुभयो। उहाँले निर्माण कार्यमा पारदर्शिता अपनाइएको र गुणस्तरीय संरचना बनाउन उपभोक्ता समिति अहोरात्र खटिएको जानकारी दिनुभयो।
स्थानीय निर्मला देवी देउवाले आफू यहाँ बसेको १४ वर्षमा पहिलो पटक सुरक्षित हुने आशा पलाएको र अब वर्षातमा छोराछोरी लिएर अन्यत्र भाग्नुपर्ने अवस्था अन्त्य हुने बताउनुभयो। उहाँले श्रीमान् विदेशमा रहेको अवस्थामा एक्लैले बाढी र कटानको त्रास भोग्नुपरेको पीडा सुनाउँदै अब आफ्नै घरमा ढुक्कले बस्न पाउने र खेतीबाली भित्र्याउन पाउनेमा खुसी व्यक्त गर्नुभयो।
स्थानीय नखरी देवी कामीले आकाश गड्याङगुडुङ गर्दा मनमा लाग्ने चिन्ता अब यो तटबन्धले मेटाउने र विगतमा गाईवस्तु मरेका ती दिनहरू फेरि नदोहोरिने विश्वास व्यक्त गर्नुभयो। उहाँले छोराहरू विदेशमा भएकाले घरमा रहेका वृद्ध दम्पतीलाई वर्षातमा हुने सास्ती अब कम हुने र आफ्नै गाउँठाउँमा सुरक्षित बसोबास हुने आशा व्यक्त गर्नुभयो।
